AMPATI SONGNI ONG∙BAANI ARO MONDOLINI A∙BACHENGANI
W.G. Sangma, Pastor Ampati
Ampati Songni ong∙baani: Amapati song skang salrango buringarigipa darangba songdong-a∙chakugijagipa biap ong∙achim. 1899 bilsio ia biapona Boldakgiri songoni jikma-jikse nokbongani manderang Babang A. Marak, Dongme G. Sangma, Diron A. Marak, Nokgil G. Sangma sadusa, Ringan P. Sangma, Rimchi D. Sangma, Birin Ch. Marak, Nuchong D. Sangma aro Mibal D. Sangma, Sengre G. Sangma uamangsa a∙pal-jomin pe∙e-wang∙e cha∙na miksonge re∙bachengaha. Ia manderang Boldakgiri songo dongmitingon Isolko u∙ichenggiparang ong∙e, 1899 bilsio Kristoni indin ka∙sae Jokataniko ra∙chake Dr. E. G. Phillips sahebni jakchin napbolatako ia jolo manchengaha.
Ia nokbonga nokdangrang Boldakgiri songoni katdonba∙e Dalbotpara a∙kingni ning∙o gipa Chigitchakgri minggipa songni Dabanbil sambaosa songdongchengachim. Aganritingba∙ani gita chengo Chonggra aro Bonggra minggipa adasa uamangni ambitangko Mongma dokani gimin a∙jak sokna ka∙onange am (ampatchi) kingsa anpilesa timsoahana. Ia biapo Mongmako denaman∙jaoba uko rikange 2 km. mang chel∙ao srape den∙bebeahana. Ia den∙gimin Mongmani bimang tongsa ro∙ongpilahana aro skode abrini ka∙maona romtomba∙aha ine agana. Da∙alona kingkingba adasani den∙gimin Mongmani bimangni sakki ro∙ong pil∙en dongkuenga, uni giminan ia biapko Hathisil ine bimung donbachengaha. Adasani anne timsogipa am ba ampatchiba ro∙ongpilahana. Ia dal∙begipa am ro∙ongpilgipa bimungchisa songko ‘Ampati’ ba ‘Ampatigiri’ ine bimung mingbaaha. Da∙ode ia biap Ampati songoni 2 km. mang chelao ong∙skaaha.
Isolko u∙igipa nokbonga nokdangrang 1902 bilsio da∙o songdongenggipa biap Ampationa katbaaha. Ia biap Chellipara a∙kingni ning∙o ong∙achim aro Dingan Nokma a∙kingni nokgipa ong∙achim. Ia Kristian manderangni songdong-a∙chaaniko namnikjae nokap-jamap on∙na sikjae nokrikna chimonggimin bol-wa∙arangkomangba deng∙gitake galachim.
Mondolini Ong∙bachengani: Ampatigiri songo donggipa manderang adita bilsirang song-a∙chabaani ja∙mano jelroroaha aro Isolko u∙ianio batrorobaaha. 1899-1926 bilsirangona kingkingan Ampatigiri songara Boldamgiri Baptist Mondolini Bipek ge∙sa ong∙pae janggi tangbaengachim. Adita bilsirangni jamano mande jelroroan baksa Isolna ka∙saanio aro dangdikanio dingchikrorobaaha, indaken songko niksengkalbaaha. Ampatigiriona katbadilchengbagiparangoni Babang A. Marak Kristian mande toromko dilan baksa Nokma ong∙e songko re∙dilaha. Bipeksan ong∙aioba Ampati song Ambeng jolni Krima No. IV Sobako 1909 aro 1918 bilsirango changgnina kingking sokachake Bipekni bilgnanganiko dakmesoke gitalgipa Kristoni Mondoliko riknaba kasne kasne me∙apa-me∙chikma aro pante-me∙trarang gilja ka∙antio, sa∙ra-wal∙timchakao agan-golpoeroan baksa skanirangkoba ma∙mong Boldamgirio janapaha. Saksa sakgipina aro songsa songgipina Isolni Kattako dangdikanio altubatatna miksonge “Kristoni Pappirangko jokatna chisolo sichakaniko knakugijagipa manderangna jakgitele aganprakna bebera∙gipa sakantini bakchikungni baksako bimchipe on∙achi Mondoliko rikna” ine nisanko done Ampatigiriko ma∙mong done song sni (7) nangrime Kristian Nokdang ge 86 aro bebera∙gipa member sak 231 baksa ku∙mongrime rikna ine janapon; 1927 bilsini February 5 tariko A∙chik Baptist Dalgipa Krima Soba chang-54 gipa Okkapara Mondolio ka∙mitingo songe on∙na krara ine delegate-rang namnike ra∙chaktokmano, 1927 bilsini February 26th -27th tarikrango Ampation tom∙tae 1927 bilsini February 27th saljatchio Ampatigiri Baptist Mondoli ine songchengaha. Ia tom∙anian Mondoli skanggipa tom∙ani (Soba) ong∙chengaha. Ia tom∙bimonganio ABDK-oni mongsonggipa sokgipa manderanga, Rev. Raymond H. Ewing Saheb, Rev. Rojen Arengh, Rev. Tokham M. Sangma, Pamong Asin D. Shira ong∙achim. Ampatigiriko Mondoli songchengmitingo Pamong dongjachim, indiba skotong dake nirokna Korok G. Sangmako chairman donskaachim Deacon-ni kamrangna Choetsing D. Sangma aro Balaram Ch. Marak, Secretary-na Sira P. Sangmako seokchengachim.
Ampatigiri Mondoli songaoni adita bilsirang janggi tangbaengon kamrango jaksokbate kana chaprimgimin Bipekantikoba jatangchi chadengna didiroroaha. Mondoli ong∙bachengaoni da∙alona kingking Mondoli gesni (Bainapara, Darugri, Anangpara, Jongchetpara, Bandalkona, Chellipara, aro2015-Chengkompara)-ko at∙chiatskaaha, iana chinga mairongpile Isol Jihovako mitela. Da∙alo Ampatigrio Bipekge 13, Kristian nokdang ge 608 aro napbolgimin bebera∙gipa sak 2562 member-rang dongkuenga. Ia Bipekrangoniko ge∙sniko nangrimate aro Hathisil songko ma∙mong done gitalgipa Kristoni Mondoliko rikna re∙chakataienga, unigimin na∙simangni bi∙anio ching Ampatigirikoba gisik ra∙pachina sakantiko mol∙mola.
Da∙o Ampatigiri Baptist Mondolini bilsi 90 janggi tangbae bilsi 100-na re∙chakatskaengaha. Isol Ampatigirina namgipa dilgiparangko on∙e pattianiko chotchanggija on∙enga. Mondoliko 1927 bilsioni rikbaengon Pa Choetsing D. Sangma oni chanbae Pa Wepster G. Sangmaona Pamong sak 14 ong∙engaha. Pamong Wepster G. Sangma, M.Div. aro dakchakgipa Pamong Ma Jakmesil G. Sangma, BD full time ong∙e Mondolio dangdike on∙enga. Mondoli home mission field damggni (Agisimgri aro Chidaogri), foreign mission Myanmar-o damsa (Tamu) aro Matchakol Mondoli baksa partnership Bengalore A∙chik Christian Fellowhip-ko jako ra∙e missionary sakbriko rakie Kristoni Mondoliko rikpaenga. Bilsi 100-na re∙mikanganio One Church One Congregational Ampatigiri Mondoli re∙chakatenga.
********************************************************************
